Al quindaz ad Lui a Sant’Angiul l’è sempar una festa granda. Al bèl l’è che mi a la prucessiòn ga vo da quand son sindach, parchè prima sevi no gnanca c’la fèvu! Ghi da savè che tanti “primi cittadini” i ga van, invitadi dal sindach Crespi, anca parchè l’è al mument bon par parlà cun vun e cun l’oltar, curà quest e sta ssu quela, fa finta ad gnent e rigulà a rent al president o l’asessur pruincial e...via discorendo. Mi vo par la Santa e intant che son lì... ma guardi in turn e fo balà l’oegg!Rivad in ver al municipi, la prima perssuna c’ho vist, gnan a fal aposta, l’è stai Cristiano Devecchi, pugiad a un paracar cul telefono in man. Ho pensad: tal lì al cumissari dla Pruincia ad Lod! Propi lu par prim, un segn dal destìn! Devecchi l’è stai al prim assesur che ho cunussud, quel che al m’ha fai sarà su un pruget che da vinticinch ani e passa al stèva sul goz a num de Vori.Cunusèvi nissun in Pruincia, seri noeu dal mastè. A Vori ho arditad la questiòn dla rutunda dal cunfìn. Ièvu bèle cambiad idea tri o quatar volt quei che gh’èra prima da mi in Cumun: e mi, fai che ruà, ma truèvi un pruget da sistemà cui finanssiamenti scadudi. Son andai a Lod e a la fin son gnud foera toni mè prima, ma propi in dal mentar che seram adrè a traversà al curtil, Devecchi al ma fa: “Ascultem: se te me dè tre zent mila euro, mi te do la caserma e cun i to tre zent mila euro te fem la rutunda a Vori.”Mi son restad gnan me mi, l’ho guardad cun una facia tame quel dla mascherpa e poe g’ho di: “Nèh, tla sé cume l’è, a Vori al pruerbi al diz che i Santangiulìn ien...” E lu: “ ...tuti ladri e assassin! Ma guarda che parli sul seri!” Canda la mè Ruzin! Du di prima la Peg Materia Strano la m’èva ciamad in Prefetura: “Mi dica se vuole mantenere o no i Carabinieri a Orio.” E mi gh’èvi rispost: “ L’ho detto e scritto in campagna elettorale: noi vogliamo tenere i Carabinieri a Orio.” Parchè gh’èra un Cumun arent a Vori cun un pruget dla caserma noeva bèle che prunti... Tuti i san cume l’è finida: Devecchi l’è stai ad parola, e mi istess, e a Vori gh’em la rotatoria e anca i Carabigneri cun la caserma a post par ben!A la prucessiòn dla Santa Cabrini sa sufeghèva, ma i mè culeghi ieru tuti in giaca e cravata: ga sarà sstai una vintina ad sindaci cun in testa Domenico Crespi, al cap e padròn ad cà. Mi ma son vist i oegi dla gent adoss: l’unich in camisa seri mi! Pudèvi dagh da trà a la mè dona e avaressi fai pussè bela figura! Ben, andem innanss. Rivadi al munument, dopu i discurssi dal Prevost e dal Vesch, Crespi l’ha di la sua dal pulpit cume apena lu l’è bon da fa e mi senti un pret intunà un canto. Ma scapa l’ogg e... Can da la mè Rusin! L’è don Antonio! Li par li ma son emussiunad: in una sira tantu bèla, manchèva da truà un mè parent propi lì. Parchè don Antonio l’è prim cusìn cun mè papà, nassudi in dal stess curtil cun la stala cui besti da part a l’uss ad cà. Chili Poggi, so pà, al gh’èva quatar vach e mè nonu al caval. Quand Chili al rivèva in curt cun la bareta piena d’erba apena taiada e la stravachèva in tera e la mitèva in di gabioei, saltèva foera i ran, i cavalett, i panaroti... e mi curivi tut cuntent a ciapai in man! Ben, a la fin ho brassad su don Antonio e ma gnèva da cridà: tantu brau e semplicc cume so pà, pien d’amur par tuti, a setant’ani cumpidi da un po’, l’è a Sant’Angiul a dagh una man al prevost. Picinìn e rutund, cun al so buchìn da rid, sa vidèva che tuti i ga voeru ben. Al m’ha purtad a ved la ca indue è nassud Santa Cabrini l’era cuntent mè una Pasqua e al sèva pu che roba dam! Un rusari, tri imaginett, un rusari in dla scatulìna, un libretin ad pensieri dla Santa... a tuti quei che gh’èra là al ga disèva: “questo è mio cugino, è sindaco di Orio”. Ho truad anca al mè cumpagn da scola don Giorgio, ho cunussud anca Saletta, che al m’ha dai la man e al g’ha di a don Antonio: “lo conosco, lo conosco, perché scrive sempre in dialetto”... Brau Saletta! E alura adess legg anca questa chi: e l’an que’ n a la festa dla Santa ta ma savarè dì un cuaicoss amò!
© RIPRODUZIONE RISERVATA
