Cisco, l’om del balòn e del cròu Cèch

Per cumincià vöri dàu ‘na nutìsia ch’la m’à distürbàd tant: la me Pandìna rùssa ch’la m’à purtàd in gir per dersèt àni la s’è malàda gravemént e m’è tucàd rutamàla. Mi gh’è vurèvi bén tàme a ‘na surèla e, quànd l’ò ‘bandunàda quàŝi cridèvi. Na vurévi un’àltra rùssa, ma gh’èvi da spetà 8/9 méŝi per ‘vègh’la; alùra ò töi ‘na Panda biànca ch’ l’è bèla e elegànte (i dìŝun), ma la gh’à no de cèrt la “grìnta” d’la me Pandìna rùssa.

Ò p’rò truàd un sistéma per deŝmentegà no la me amìŝa del cör: ò mis sül cruscotto de quèla növa un mudelìn de Panda rùssa, insì girém amò inséma e sém cunténti tüti dü.

Pàssi adès a ‘n’argumént püssè impurtànt. Ve cùnti la stòria d’un cròu de num Cèch, na stòria ch’ò bèle scrit quàlche an fa, ma che vöri ricurdà (el perché la capirì a la fin). Un cruìn nuél l’è stài truàd in méŝ a l’èrba del camp spurtìu del Caŝàl dal siùr Mario Geroli. L’èra tüt sanguanént, sangagnént e cun un’àla rùta. Èl sarés mort de cèrt se i persùn ch’i se dan da fà al camp spurtìu l’avarésun no cüràd e adutàd. Tüti i s’èn ‘fesiunàdi a lü e lü el s’è ‘fesiunàd a tüti, supratüt a Cisco, el “capo” del calcio del Caŝàl. El rispùnd quand la ciàma, el se fà tucà ‘péna da lü. Quànd el ‘rìva el ghe và incùntra, el se mét ai so pè, el ghe pìa le scàrpe per fas caresà e ‘l ghe fà fèsta cun tànti “cra cra” (in dialèt naturalmént). Cèch l’è diventàd la mascòt de gràndi e picinìn. I spurtìvi i san che la Lazio la gh’à ‘n’aquìla nel so simbùl, el Caŝàl el gh’à un cròu. Vurarì mìga paragunà un’ aquìla a un cròu!! Cèch el bat l’aquila per sèt a zéro. D’acòrdi? Tànte squàdre i àn ufèrt i so campiòn : Messi, Ronaldo, Totti in càmbi de Cèch, ma el cròu el se céd no.

La stòria la gh’à un finàl duluruŝ: quàlche témp fa Cisco l’è mort per ‘na brüta malatìa e dòpu un po’ ànca Cèch l’àn truàd mort.

Cisco l’è stài un persunàg da ricurdà no apéna per el calcio; ma ànca perché cun discresiòn, amur e generuŝità l’à ütàd di giùni spurtìvi a süperà le dificultà d’la so vìta.

A Cisco Friggé è stài intitulàd el càmp spurtìu del Caŝàl per ringrasiàl del laurà e d’la pasiòn ch’l’à sémpor dedicàd.

A mi e a viàltri è vegnüd sens’àltor tristésa e malincunìa nel sént la stòria de Cisco e del so amìŝ Cèch, ma pénsi che n’la Storia de Casalpusterlengo sìa giüst ricurdà pasiòn e òmi de “tüti i dì”, ch’i àn lasàd un ségn da deŝmentegà no.

Cambiém discùrs per raserenàs, ma parlém sémpor de üŝéi.

Nel me giardìn gh’è ‘no zoo de üŝéi d’ògni ràsa ch’i fan un gaŝaghè da dì no. Gavarésun da sént i pasarìn tàme i sgaléŝun fin d’la matìna bunùra; le gaŝè i ciciàrun a bras; i tùrtur col so “tu..tu…tu..” i pàrun di tréni. De not la sivéta la taŝ no un mumént, la se indurmènta a l’àlba; ò decìŝ che stasìra ghe darò un Tavor insì la durmarà e la farà dorm i àltri. Invéce i güfi, n’èra séŝ sul pin, i ò püϋ vìsti. I avaràn truàd ‘na ca’ püssè còmuda per ‘na famìglia numerùŝa tàme la sùa. Me dispiaŝ, ma püdèvi no ligài sü la piànta.

Sùna el campanìn, vò a dèrv: i èn Davide e Lorenzo ch’i èn vegnüdi a truàn in biciclèta; ècco dedré gh’è Luca, Susanna e Davide; l’è gnamò finìda: ‘n’altra scampanàda e ‘rìva Matteo e Silvia. Che meravìglia! Tüti sèt, tüti strafüménti, bèi ‘me sùi. Òrmài i èn gràndi, òmi e done, ma i se deŝméntegun no di nòni. “Setèvos”, un biceròn d’àqua frésca e un gelàto; adès mi a gòdi a sént cüntà süϋ tànti rubatàs e… me pàsa la malincunìa. Ciau!

MINI GLOSSARIO

Bunùra: mattino presto

Ciciàrun: chiacchierano

Cròu: corvo

Cruìn nuél: piccolo corvo appena nato

Dersèt: diciassette

Deŝmentegà: dimenticare

Gaŝaghè: confusione, vocìo

Pìa: morde

Rubatàs: cose diverse

Sangagnént: acciaccato

Setèvos: sedetevi

Üŝél: uccello