Ier i curiduri ièn rivadi a Andora e dumàn i rivu al Mon Vantù!In dal mez ad luii sa parla dal Tur e salta foera che anca in di primi ani sessanta i giun i ‘ndèvu in ferie a l’estero. Angelo al Gnegne, Franco dal Nanòn e Albino al Tecnich cl’an là i gh’èvu vinticincani, vintisez e ventiset. E cun la Sezcent dal Gnene iàn decis d’andà a Barcellona.Cuiòn la mè Rusìn: apena rivadi in Francia…finiss la cartina! Angelo al guidèva, Albino l’èra quel che segnèva la strada e Franco al durmiva setad dadrè. Rivadi prima ad Nizza, i guardu la cartina e …i sevu no da che part andà. Era finid la cartina d’ Albino: parché la segnèva l’Italia e un tucunìn ad Francia e poe pu gnent! L’è Angelo che la cunta ssu. “ Num sevam no in due andà. Gira da chi, gira da là…a un certo punto cuminciem a andà su e su e su… Prima una strada drita e cun un po’ ad curv sempar in mez ai pin, poe pu gnent: apena sassi e pred, pred e sassi: sa videva pu gnanca una pianta. Ma indu semia? Sem truadi senssa savel sul Mon Vantù, propi due riva al gir ad Francia. S’la cerchevam la truevam no! E al bel l’è che lassù vignèva un’acqua, ma un’acqua…seram bon no da ven zu dla machina. Em lassad balcà un po’, poe sem fermadi in d’un’usteria, ma capivam un cristu! Em capid apena che evam sbagliad strada! Sem andai zu da l’oltra part e viaaa! Al di dopu sem ruadi ad Andorra. Al camerè al parlèva un po’ l’italian e n’ha di da andà al santuario. E inssi sem ruadi fin a Lurd.Num seram in gita e tuti i posti i ‘ndevu ben. A la fin sem rivadi a Barcelona, due sem stai tri nott. Vurevam andà su l’isula, ma gh’èra da prenutà l’aereo tri sman prima. In dal risturant sevam no che roba urdinà, poe Franco l’ha legiud al menù e l’ha di: guardè, gh’è al pulein. Che rob’el? Al pulein al sarà al pul, mangem quest! L’è stai inssi che è rivad in dal piatt un rubin gross m’è una nuz e mi ho l’ho guardad tame quel dla mascherpa. Setad a un taulìn gh’èra vun che na guardeva e al ridiva a brass. E mi: vara mal rid! Ben, l’èra un italian che laurèva li arent e che n’ha urdinad un pull cume si deve! Em cuminciad a rid e a boeu …Num em ciapad una bela ciuca, ma una bela sumia a gl’em fai ciapà anca a lu!”.
© RIPRODUZIONE RISERVATA
