In gir per el mund, bèla còmuda stàda sül divàn de cà mìa ASCOLTA IL VIDEO

Quanti viaggi si possono fare grazie alle foto che arrivano da figli e nipoti: e se poi si va in vacanza insieme...

Maddalena Negri

‘St’estàd me son ersüstàda a girà el mund. Son ‘ndài in América da la part di canions indùe girèva John Wayne i film westerns ch’i èn la pasiòn del me om. Me parìva da véd dapertüt cow boys e indiàni végn föra dài strapiùmbi. Che spetàcul!

Pöӧ son stài déŝ dì da l’àltra part, per inténdos dùe gh’è New York. Prìma de tüt ò visitàd cun tànta emusiòn el Muŝéo del Vündos Setémbor, Memuriàl d’la distrusiòn d’le Torri Gemelle nel 2001. L’èra martedì e ch’èl mumént lì sèri adré a stirà davànti a la televiŝiòn; ò visti l’urùr in dirèta. Gh’ò amò tüt ni òci.

Il dialetto sul "Cittadino" Un’estàd in gir per el mund. Video di Maddalena Negri

A Washington ò vist la Casa Bianca e el Pentagono, me parìva da és el Presidente degli Stati Uniti e ò mis ‘na bùna paròla per la pàce nel mund. Sperém ch’i me ‘scùltun. Ò fài shopping da Tiffany; a dì la verità me son lustràda apéna i òci cun tànti brilö, ma ò töi gnànca ‘na culanìna ...trop per el me bursìn. Ò giràd per Filadelfia e divèrse àltre cità. L’América l’è pròpi grànda. Ànca le cascàde del Niagàra i èn spetaculùŝe.

L’è gnamò finìda: son ‘ndài in Tanzania a le fàlde del Kilimangiàro e ém fài un safàri in méŝ ai bésti ch’i girèvun lìberi viŝin a nüm. Parìva da és nel mund del Re Leone, el cartòn de Walt Disney ch’ò vist mìla volt cun fiöi e neùdi. Ò incuntràd dal vìu i leòn Simba, Nala, Mufasa, Scar, el facocero Pumba, le sùmie, le iéne ...

Per ripuŝà son ‘ndài al mar a Cupra, Sanremo, Arma di Taggia. Dòpu a Lampeduŝa, a l’Elba, in Sardegna e in Sicilia. Intant che sèri adré ò fài ‘na scapàda a Malta, Barcellona e Formentera, pròpi bèle.

Diŝarì: “Tàme te fài a véd tüti chi pòsti chi!” Fàcil! Sénsa stracàm e sénsa spénd gnànca un ghèl, i ò vìsti bèla còmuda stàda sül divàn de cà mìa. Tüti i dì fiöi e neùdi i ne mandèvun fòto e vìdeo d’i so viàgi, insì mi e el me om l’è tàme füdésom ànca nüm in gir per el mund.

Bàsta schèrsi. ‘Na vacànsa vìra l’è ànca st’an quèla cùi nòsti neùdi a Rimini, tàme ém fài per 25 àni da quànd i èrun picinìn fin a ‘dès ch’i èn tüti òmi e dòne. L’è sémpor ‘na stemàna de Paradìŝ: sul, mar, amùr, tenerésa e felicità.

Comùnque Caŝàl l’è sémpor el püssè bèl paìŝ del mund, supratüt a San Burtulamé. Tüt l’è “russ”. V’la pitüri insì:

R U S S

// Agùst vintiquàtor, / San Burtulamé, / dì de sàgra al me paìŝ. /Àfa, sul ch’enciuchìs, / càmpi fiuràdi da mìla papàveri / ni òrti cucümeri tàme balòn / e grapéi de tumàteŝi carnùŝi.

In Césa paraménti vernighénti. / e füm de candìl, / la bànda la màrcia in divìŝa cremìŝi./

Sü la baléra / vàlser e tànghi fughénti, / süi brasch lugànogh rustìde,/ se stàpa butìglie de vin./

I gìrun le giùstre, / süi cavalìn facìne strafuménte / e fiuléte cul rusét. /

El sul el tramùnta nel fögh, / l’è sìra: / d’impruìŝa un sgriŝulòn, / cascàde de fiùri brilénti i spàcun el ciél .........oh…… fin a la trunàda finàl.

Fèsta / Alegrìa / Fracàs / … Russ. //