Pasi du o tri volt al dì dal mè pais e guardi i ca adrè a la strada. Sul canton dla via noeva la cà d’Ernestìn Paiòn l’è amò tale quale son nassud. La clèr tuta rusnenta la g’ha in ment pu quant l’è stai tirada ssu l’ultima volta. Ma par da vedal amò ven foera dal purtòn cun la so Renault 5 bianca in due al carghèva i strassi da vend. Giri l’ogg e vedi a destra suta al purtòn al furn ad Carlètu minciòn. Al Tètu l’è indren a fa coz al pan e al canta “Non ho l’etàaaa...non ho l’etàaaa”. In piassa suta la porta dla Culumbina gh’è Nucent che al ma salùda e intant Vaca Magra al passa da fressa cun sui spall un quart ad bestia che l’ha fai che massà. Al sacramenta cun Jole, la so dona, che la ga va adrè tuta sparfumenta e russa in facia. In pè, dritt mè un fuz cui man in sacocia, in su la porta dal Trianòn gh’è Pegura: cume al ma ved al leva al capel e al ma saluda cul buchìn da rid. Setad al taulìn cun la carafa in man, un umòn russ e paciucòn, la canotiera bianca e i cavei tiradi e un po’ imbrilantinadi: Balota l’è adrè a inviala, ogni gulòn ad vin la invia cun la vioela.L’è apena ruad a cà dal laurà in ferovia, la mis al so Vespìn suta al portagh, l’ha cavad la giaca bleu e la camisa bianca, e l’è gnud su dal buchiroel in canotiera cun un micon ad pan suta al brass e un pumataz in man: cun la curtela lunga la taia a fet tame se al fuss un prosciuto crud! Al canta, l’è cuntent mè una Pasqua: pan e pumataz e lu l’è a post par tuta sira. La giurnada ad laurà l’è finida, adess sa poed boeu un bicer o du o tri, setadi foera dl’ustaria, bel chiet mè un angiul, a invià una cantadina e ciapà su dal sugaman dai soci che passa. Che om Balota! L’ho mai vist rabiad in vita mia. Quand la so Paula la ga bravèva parchè al ruèva a ca pussè da là che da qui, al fèva una cantada e via in cà.In facia al trianòn, suta al figh sa seta el Pièro a ciapà al fresch. Lì da part, da la butiga dal frutaroel, ven foera Rosolina tuta da fressa, burbutenta e rabiusa: Santìn al met indrèn i casset dla verdura e al sara la porta senssa mai di un bec.Santìn al gh’èva al num in testa. Andèvi a toe un persagh o un pum e al prufùm ad fruta e verdura al ma ciapèva dapartut; sul banch ad legn, i fasoei muiadi in dl’acqua i ma guardèvu cui so ugìn negri e mi guardèvi lur. Da part, la patuna la ma pariva una roeda prunta da fa rigulà su dal valòn. In piassa in due sa ferma i curier che riva da Milan, da una part gh’è la butiga da mè papà al barbè e da l’oltra al Cafè dal Luinè. I clienti dla butiga i traversu la strada pr’andà al Cafè, in due la gent la ruza par ved la partida a la telavisiòn. Cla sira là giughèva Inter – Liverpul. L’Inter la gh’èva da venss cun tri gol par passala liscia. La gent la fumèva e la vusèva dopu al prim gol, ma l’era no assè. Al cinema l’è stai quand ha segnad Peirò. Cuiòn la mè Rusìn! Al purter al gh’èva in man al balòn e la feva saltà: una volta, du volta , tri volt...è rivad dadrè Peirò e, tame un gat cul so zanfìn, al g’ha rubad la bala e l’ha tirada a porta voida. I inglesi ièru mati, i gh’èn curssi adrè a l’arbitro che al curiva a centrocamp, sa sèva no ben ben cume l’era la facenda. In dal Cafè ièru tuti in pè a vusà mè mati: pussè d’vun pro al gh’eva pagura che l’era no propi un gol regular, quand tut d’un bot è saltad in sul taul Pino Milanes tut sparfument a vusà mè un mat: “ Palla al centro, palla al centro...” E l’arbitro al sé girad in ver da lu, cume se l’avess sentud: 2 – 0 e palla al centro.
© RIPRODUZIONE RISERVATA
