Me àügüri che Cappelletti el se cunvertìssa

M’à fài un piasè da matt a véd l’artìcul de Pierluigi Cappelletti sül Cittadino del 26 de genàr. Pensèvi gnànca pü che ’l se ricurdés amò de mi, cun tüte le atività che el gh’à e che el gh’èva: maèstor elementàr, clarinettista in d’la banda, prufessùr de inglés, amante d’la natüra e via dicendo. Indrén de mi l’èvi defìnid cùme Oméro l’èva definìd el so Odisseo: “...quell’uom di multiforme ingegno...“.

Chi sa perchè, ma me son sentìd urgugliùs quand ò savüd che l’èra diventàd ànca Sìndich de Vòri, cùme m’èra sücès quand un àltor mè culéga, Paolino Abbà, l’è stài Sindìch ànca lü. Vàrda cùme d’i mè culéghi i èn stimàdi al so paés!

E me son ricurdàd d’una volta che son stài nel Municìpi a Vòri per presentà un mè lìbor. E me son ricurdàd ànca quand (guidèvi amò la màchina) son andài in d’la clàss del maèstor Cappelletti e me son divertìd amò, dòpu un po d’àni che la fèvi pü, a fa una lessiòn a chi fiöi là. E me par che i èvi fài divertì cun el nost dialèt, ànca se el mè l’è un po divèrs da quel de Séna e de Vòri.

M’à fài un àltor gran paisè a légg che, ùltra a éssos no desmentegàd, Cappelletti el me vör bén. Vurè bén a un quaidün vör dì che se ghe àügüra d’le ròbe bèle e büne. Ch’él sàpia che ànca mi el cuntracàmbi, cun l’aügüri che ànca el so impégn da Sìndich, che l’è una ròba mìga da poch, el ghe dàga tante sudisfassiòn e che el pöda fa cunténti i so aministràdi.

L’istés dì, in d’la stéssa pagina, ò güstàd (cùme de sòlit) l’artìcul d’un àltor che scriv d’le ròbe sémpor güstuse: el “Vigilòn“ Alessandro Pizzamiglio de S’cügnài, che “per la massima parte“ el s’è adeguàd al “codice“ de scritüra che è stài prupòst, tant per fa mìga nùmi, da Pezzini, da Tonani, da mi e da un qualcun àltor. Me àügüri che ànca el bravo Pierluigi Cappelletti el se cunvertìssa, almén un po, a la scritüra che ém prupòst, almén un po. L’istés aügüri el fo ànca a tüti quei che tröva güst a scrìv in dialèt.

E tüti inséma ringrassiém el diretùr Pallavera per la so uspitalità.

di Aldo Milanesi, Casalpusterlengo