«L’è sempr istess!>> Adele l’ha di giusta: l’è sempr istess! La Mariuccia che in di primi ani Sesanta la guidèva al Gusìn russ da so papà par purtà a Sena la verdura e la fruta da vend che l’andèva a toe a Uspedalett, l’è amò la Mariuccia che dopu cinquant’ani da suora l’è su l’altar a ringrassia al Signur par prim, e poe parenti e amisi. L’è sempar la Mariuccia tuta indafarada che la pariva un mas-cc par la manèra che la gh’èva da fa.Sono a Mesa Granda a Sena, invitad da don Giuseppe par la festa di cinquant’ani d’urdinassiòn ad Suor Maria e don Nando. Mariuccia la mèva telefunad una smana prima par invitam...Son setad in dla banca davanti, cul sindich ad Sena e Adele l’è setada arent a mi. Parché anca lè la ga una zia, Suor Luisa Bassi, che la fa adritura i sessant’ani d’urdinassiòn. Don Nando la fai una predica propi bela sul figliol prodigo, ma l’ha ricurdad anca che Sena in da chi ani là l’ha ga dai tanti vucassiòn al Signur. Candalamè Rusìn! L’è propi bèla cla roba chi! Parchè gh’è da savè che in d’una curt in due stèva sett o vot famili, gh’è stai in pochi ani tri preti e una suora: don Antonio Poggi e Padre Paolo Poggi, don Nando Brizzolari e suor Mariuccia Poggi. Ma vignèva al magòn, a un cert mument dla funssiòn, quand Mariuccia l’ha ringrassiad so mama e so papà, e anca so surela Tugnina. Ma son vist da fiulìn in da cla curt là cun tuta dla gran brava gent che ho cunussud. Da Rosolina andèvi di volt a la sira a mangià la minestrina cla preparèva cui verdur che la vendèva in negossi in piassa. Santìn Poggi, al so om, al gh’èva al num in cò! Un sant’om e alura gh’è no da meravigliass se Mariuccia l’è andai a suora. Ma so mama Rosolina l’èva ciapada no trop ben ben...Poe l’ha capid, l’ha vist che passiòn Mariuccia la ga mitèva in dla so missiòn. In cà da Tugnìna invece andèvi da spess a giugà cun so fioel Mario. Tuta gent ad cesa, devota e unesta e generusa, come l’era Chili Poggi, al papà ad don Antonio e Padre Paolo, che al stèva in facia a num.A la fin dla messa, suor Mariuccia l’è ‘ndai al microfono a ringrassia tuti, e la fai a lo so manera: cun una carica a la garibaldìna. Anca in dal vestì, sempar cui brassi fai ssu tame vuna che g’ha no da perd temp, parchè gh’è da dass da fa! A messa granda la gh’èva una maietina a meza manica, tame quei subat prunti a testimunià pra’l Signur e a fa dal ben.In dla prima banca gh’èra setad i tri o quatar fiulìn cun una mama. M’è gnud in ment quand ma setèvi mi da picinìn cui mè amisi: gh’èra sempar una suora a tegnan d’oegg: suor Virginia. A l’elevassiòn la ma sugeriva pian pianìn i parol da dì al Signur... Che furtùna a cunuss e veggh visìn di suor inssì !
© RIPRODUZIONE RISERVATA
