Se sa che a diventà vegi se ven anca un po’ di stüfagent, ügnün el ga la so specialità. Chi l’è che diventa un piög amaestrad, chi lé che l’è gelus dela dona (magari l’è anca brüta e rugnusa…), chi l’è che el va en gir a rumpegh i pendisi ala gent.Ben, in mes a tanti e tante robe che i me vegnun en ment, ghera vün che la ciamevun Gaetan, che el gheva la pasion de andà en gir a dumandagh a vün e l’alter tüte le robe che ghe vegneva en ment. Dunca, Gaetan l’era un sciur, pensiunad e abastansa cunusüd da tanta gent. El so laurà l’era de andà magari a cimentà vün e cun el riturnelo de “El me scüsa, el disarà che son curius…”, el ghe feva l’interugatori. Una volta l’è andai da vün che l’era adrè a sistemà la ca, un palasòt due el steva: “Alura, sciur Peder, distürbi? (e Peder l’a pensad: “No, el rumpe duma e bale…”) Son curius, perché l’a pitürad la ca föra cun un culur e de nel curtìl cun un alter?”.“Perché denter l’è per el padròn, föra per i cuiòn”.“Ah! El ga resòn, dabòn, dabòn”.Un altra volta Semper dal sciur Peder: “El disarà che son curiùs… (e Peder: “La sevi fin da prima…”), ma cume mai el ga dü entrade al so negosi de angul?”.“Negosi de cantòn, fa sü i soldi anca un sifulòn”.“L’’è vera, grasie”.Invece un’altra volta da Giacumìn el barbè l’è andai in negosi e dopu el ga dì: “La to cügnada, la Greta Garbo, quela che la fa l’urtulana, l’è stai malada?”.“Ma dabòn, eh sì, sì, l’era malada”.“Però l’ültima volta che son andai a fa la spesa, la ma ciavad. Te disi che i maribulàn iérun tüti palpadi, i pumi-granìn i sevùn né de mi né de ti, e i ciuchìn ierun moi e i parévun fina ciuciadi dala sgagnaciuchìn, quela che laureva al Lot”.Un’altra volta l’è andai da un banchét de furmag en piasa, el strachiné, e quand la vist rivà el ga dì ala so dona: “Siura Rita, duale l’è el so om?”.“Ma el sarà andai a pisà, l’è chi una man de temp che el ga di guai a tegnela”.“Siura Rita, el disarà che son curiùs, ma l’è tant temp che el ghe sücede? L’è andai no dal dutùr? La me dona la se gratéva dapertüt, la gheva una infiamasiòn, lü el ga dai un decot, e l’è stai ben. E che la scüsa la curiusità, l’è mai stai? Vör dì che el sta ben” (E le: “Se vedi no lü, sto ben püsé amò, tiri un buf”).Dopu l’è andai dal ciclista a Porta d’Ada, e lì l’a incuminciàd la solita sulfa: “Che el me scüsa, el me disarà che son curiùs, ma quanti ragi la ga che la bicicleta chi? Ién tüte istes, o no?”.“Alt – la dì el ciclista – ades ghe fo mi una dumanda. El disarà che son curiùs, ma le mai andai a dà via el šeber?”.“El šeber? Se l’è? Un melòn gros?”.“No, ma el ghe sumiglia. E ghe do un cunsili: el vaga al casòta del Magnàn andrè a Ada, el vaga tra quei chi en là a giügà a carte, o magari a bev e cantà, e che el se fasa spiegà da lur quel che go dit!”.“Sensa es curiùs, me la disaràn?”.“Credi de sì”.
© RIPRODUZIONE RISERVATA
