Viva Santa Cecilia, viva la Banda ad Sena in divisa bianca e la prima cun quatar don

Utantatri ani l’è una bèla età, püsè bèla amò pr’una Banda ad sunadù. L’arcipret don Ernesto Merlini al gh’eva pasiòn cun la müsica: a mesa granda quand al intunèva “Tantum ergum sacramentuum...” al so vušòn al rimbumbèva suta tüta la volta dla ceša.
L’è stai lü a tra ‘n pè la banda a Sena. E so neud, al maestar Ernesto Merlini, l’è rüad a dirig la Banda a la fin di ani nuanta. Che lesiòn c’al fèva! Gh’èra da fas su i bafi! Em südàd, ma em imparad a sunà di rob che na deva tanta sudisfasiòn. L’ha trai insema un bandìn da set o vot, un “ansambl” cun quei püsè in gamba e seram tüti atenti tame ala Scala, vulèva no una musca.
Mi ho cuminciad a sunà a vündšani. La scola ad müsica l’era tuti i venerdì da sira: Mario Marcel al ma fèva imparà a sunà al clarin, pö rivèva “al Moru”, Angelo Pozzoli, diretur dla banda dal 1938 al 1986: l’era lü, un uperari dla Safa, che al fèva imparà a tüti a sunà un strument. Se al clarìn al sifulèva, vurèva di che cui me didìn stupèvi no ben i büsi, alura lü al ma tignèva i didi tacadi al strument e al ma fèva rifà la nota.
Dopo un invern, quand evam imparad la scala e i pušisiòn di ciau, sa cumincèva a sunà i marc religiuši püsè facii: “Cristus vincit”, “Sonno eterno” e “Cuore infranto”. In primavera andevam tüti a imparà a marcià: “al Moru”, sempar lü, na mitèva in fila su la stradina in fund al Padül e na dèva al pass: uno due, uno due... Uno, piede sinistro!
La banda ad Sena l’era famusa parchè i sunadù ieru in divisa bianca. A vedla pasà l’era un spetacul! “Al Moru” la guidèva cun in man al sasofono e tüt dinuculènt al dèva al pas. In prima fila gh’èra Italo cul quartìn e i primi clarin: Carlìn, Lino šanìn, al Gnene e Pierino. Dadrè, i secundi clarin: Mario Marcel, Steu al sepultur, Marcunetìn, mi e Poldu cul sax cuntralt.
In dal sesantanöu la banda l’è finida adritura in televišiòn a “Cronache Italiane” su Rai Uno, parchè l’è stai la prima banda a inserì quatar don: Piera, Adriana, Renata e Sandra in pedagn bianch e cul clarìn in buca ien stai visti in tuta la Lumbardia.
Viva Santa Cecilia, viva la Banda!