Viva le Ulimpiadi, ma quante robe farlòche

Sa c’entru Sant’Ambrös, i piciòn e le pégure cun le Ulimpiadi? Va a savèl, dišarì. A pensàgh sü du pé miga tant, ma qualcòs i ghe n’intru, fidèves. Da un qual dì i èn cuminciàde le Ulimpiadi de Parigi, le numor trentatrì de la storia mudèrna (le tèrse d’la “Ville Lumière”) e ben o mal na sém bèle asè: cume semper i èn le püsè urganisàde, le püsè sicüre (sperem!) e via de record. Insì nüm parlarém de robe un pitìn farlòche che pü das i san miga tüti, e ‘ndarém ‘ndré nel temp per pö turnà ai nosti dì. Un viag che a la fin, se spera, iütarà a capì ‘me le robe i cambiu cul temp e che ‘na volta l’èr miga ‘nsì bèl ‘me se cunta sü.

Le Ulimpiadi i an inventàde i Greci, e fin chi se scapa no, ma i èru duma per lur, che i se dèvu un gran dà sü. Incò disaresem ch’i èru rasisti. Per lur un furèst l’èr ‘na béstia, un “barbaro”. Tra ‘na roba e ‘n’oltra quèle “végie” i èn dürade quasi mila ani, per la blésa de düšentnuantadu edisiòn: dal 776 prima de Crist al 393 dopu Crist. E cume mai un dì l’an mucàda lì? Perché l’imperadür ruman Teudosi prim e Sant’Ambrös, vésch de Milàn che ‘l gh’èva ‘na süca düra asé, an dì basta: tüti ‘sti omi mési biuti i se pödu no ved, par ‘na fèsta d’pagàn. Tüti a ca’, vunciòn!

Per turnà a véda qualdün sgambetà p’r una medaia (un temp se vincèva duma la curuna d’alòr) tuca spetà el 1896, quand dopu tant brigà el baròn Pierre De Coubertain l’è riusìd a rifài propi ad Atene. De Cubertain incò el ciaparés sü del marter prò: le done i a vurèva no. «L’eroe olimpico per me è il maschio. Un’Olimpiade femminile sarebbe poco interessante, antiestetica e scorretta», l’èva di’ el furbòn. Duma quater ani dopu e propi a Parigi i an vursüde, an’ si èru apena vintidu; ‘st’an invece i èn quasi pari a i omi, e l’èra ura. E pensà che ‘n quèle d’i Greci i püdèvu gnanca setàs a vardà, se no i ghe fèvu la pèl!

I Greci prò i èru stai bon almén de rispetà la “tregua olimpica”, da scanàs no quand gh’èra i giöghi. E a lur ghe piasèva un müĉ scanàs. Un po’ me nüm, che prò sem amò püsè cuiòn e i a druém ‘me scüsa per fa casìn e cupàs: chi s’è desmentegàd s’l’è sücès a Monaco nel 1972? O a Mosca e Los Angeles nel 1980 e 1984, che cul buicutàg i èru stai püsè pulitica che sport?

E i piciòn? Semper a Parigi nel 1900 e per furtüna apena lì, gh’èra stai el tir al piciòn. A la fin d’la fera, ansi d’i giöghi, n’an cupàdi tréšent: gh’è da sperà che almén s’i èn paciàdi, giüst per da’ ‘n sens a qualcòs che de sens ghe n’èva no. Cume de sens ghe n’èva gnan la Tour Eiffel, incö simbül de Parigi; quand l’an tiràda sü per l’Expo del 1889, tüti la vurèvu tirà šu sübit perché l’èr duma un toc d’fèr an’ brüt da véda.

Turta finida sem turnàdi a nüm, dopu ‘n girèt bel lungh e pien de robe da créd no. E l’è adés chi rivu le pégure. Perché cume em vist, le robe sicüre de incò un dumàn i pödu diventà pirlàde, giüst per capìs. E ‘ndà ‘dré a i oltri ‘me peguròn l’è mai trop da taiàdi, anši.

DIZIONARIETTO

sa c’entru: cosa c’entrano

qualcòs i ghe n’intru: qualcosa c’entrano

farlòche: strane

dà sü: darsi arie, essere snob, altezzosi

l’an mucàda lì; hanno smesso

setàs a vardà: sedersi a guardare

taiàdi: furbi